31. mai 2010
Ombodet gir også råd
Dersom du lurer på noko som har med diskriminering å gjere, kan du sende ein e-post eller eit brev, ringje oss eller møte opp i lokala våre.
Rettleiingssaker
Ombodet gir juridisk rettleiing om likestillingslova, diskrimineringslova, likebehandlingskapitlet i arbeidsmiljølova og føresegnene om ikkje-diskriminering i bustadlovgivinga.
Dersom du har spørsmål om rettar eller plikter som du trur har noko med dette regelverket å gjere, kan du ta kontakt. Ombodet gir også rettleiing i saker som har med diskrimineringsspørsmål å gjere, men som ikkje direkte fell inn under diskrimineringslovene.
Dersom spørsmålet ditt fell utanom arbeidsfeltet til ombodet, vil vi prøve å rettleie deg til ein annan stad du kan få hjelp.
Teieplikta
Ombodet har teieplikt. Det gjeld alle opplysningar som nokon hos ombodet blir kjende med i samband med behandling av saker eller på annan måte gjennom arbeidet. Teieplikta gjeld opplysningar som ein normalt vil halde for seg sjølv.
Det kan dreie seg om helsespørsmål, tilhøve på arbeidsplassen eller noko anna som ein ikkje ønskjer skal bli gjort kjent for andre. Det er likevel viktig å vite at ikkje alle opplysningar er teiepliktige. Til dømes er namn og personnummer i utgangspunktet offentleg, med mindre det avslører andre opplysningar som er teiepliktige.