Arbeidsgivaren må leggje til rette

Arbeidsgivaren må leggje arbeidsplassen til rette slik at funksjonshemma kan utføre arbeidet på lik linje med funksjonsfriske.

Arbeidsmiljølova gir arbeidsgivaren plikt til å leggje til rette for at arbeidstakarar med funksjonshemming skal kunne jobbe i verksemda.

Plikta inneber at arbeidsgivaren, så langt som råd, må setje i verk nødvendige tiltak for at funksjonshemma skal

• kunne få arbeid eller behalde arbeidet
• utføre og ha framgang i arbeidet
• ha tilgang til opplæring og anna kompetanseutvikling

Dersom arbeidsgivaren ikkje legg til rette slik at funksjonshemma får same høve til å utføre arbeidet som funksjonsfriske, kan det reknast som diskriminering.

Arbeidsgivaren pliktar å leggje til rette for at arbeidstakarar som blir funksjonshemma, for eksempel på grunn av ei ulykke, skal kunne halde fram i den same jobben.

Tilretteleggingsplikta har visse avgrensingar. Grensa for kva tiltak arbeidsgivaren har plikt til å gjennomføre, vil variere ut frå kva slags funksjonshemming og kva verksemd det er snakk om. Arbeidsgivaren må gjere ei konkret vurdering i kvart einskilt tilfelle.

Arbeidsgivaren pliktar å setje i verk nødvendige tiltak, med mindre dei inneber ei urimeleg belastning. Bedrifta må med andre ord å gjere det som er praktisk og økonomisk mogleg. Folketrygda dekkjer dessutan visse utgifter til tilrettelegging.

I tillegg vil storleiken på verksemda kunne påverke kva for tilretteleggingstiltak arbeidsgivaren må innføre.