13. sep 2011
Konvensjonane
FNs kvinnekonvensjon
I 1979 blei FNs konvensjon for å avskaffe alle former for diskriminering av kvinner vedteken. På engelsk heiter konvensjonen Convention for the Elimination of all forms of Discrimination against Women (CEDAW).
Konvensjonen fastset i rettsleg bindande form internasjonalt anerkjende prinsipp og tiltak for å verne kvinner mot alle former for diskriminering når det gjeld sivile, sosiale, økonomiske og politiske rettar. Som eit ledd i å oppnå faktisk likestilling mellom kvinner og menn gir konvensjonen vern mot direkte, indirekte, strukturell og multippel diskriminering av kvinner.
Noreg ratifiserte konvensjonen 21. mai 1981. Konvensjonen er teken inn i norsk rett gjennom menneskerettslova. Det betyr at dersom det er motstrid mellom konvensjonen og anna norsk lovgiving, skal konvensjonen komme først.
FNs rasediskrimineringskonvensjon
I 1965 blei FN-konvensjonen om å avskaffe alle former for rasediskriminering vedteken.
Målet med konvensjonen er å sørgje for at grupper som blir forskjellsbehandla på grunn av rase, hudfarge og/eller etnisk opphav, har dei same rettane som alle andre. Konvensjonen var den første menneskerettskonvensjonen som blei vedteken av FN.
Konvensjonen tredde i kraft 4. januar 1969, og Noreg ratifiserte han i 1970.
FNs konvensjon for rettane til personar med nedsett funksjonsevne
Konvensjonen blei vedteken av FNs generalforsamling i 2006.
Målet er å fremme, verne om og sikre menneske med nedsett funksjonsevne full og likeverdig rett til å nyte alle menneskerettar og grunnleggjande fridommar, og å fremme respekten for verdigheita deira.
Noreg underteikna konvensjonen i 2007, men det er førebels usikkert når regjeringa kan fremme ein proposisjon til Stortinget om ratifisering av konvensjonen.